Dosberthir unrhyw faterion neu ddadleuon o natur anariannol sy’n ymwneud â phlant fel achosion cyfreithiol preifat. Lle bynnag y bydd yn bosibl, rydym yn annog pobl i ddatrys eu dadleuon y tu allan i’r Llysoedd. Caiff hyn ei ystyried orau i’r plant.

Gall cyfryngwyr annibynnol hyfforddedig gynorthwyo partïon i ddatrys eu dadleuon mewn modd anwrthdrawiadol y tu allan i’r Llysoedd.

Os na ellir datrys materion y tu allan i’r Llys, gellir gwneud ceisiadau am nifer o Orchmynion Llys gan gynnwys gorchymyn yn nodi gyda phwy y dylai’r plentyn fyw; pryd dylai plentyn weld person arall; a ddylai rhywun gael ei rwystro/rhwystro rhag cymryd camau penodol mewn perthynas â phlentyn; ac unrhyw faterion sy’n gysylltiedig â phenderfyniadau o bwys ym mywyd plentyn.

Os yw achosion Llys yn angenrheidiol, cyflwynir cais yn y Llys. Fis neu ddau yn ddiweddarach, mae apwyntiad byr yn y Llys fel arfer gyda Chyfryngwr o fewn y Llys. Mae unrhyw gytundeb wedyn yn rhoi terfyn ar y mater; mae diffyg cytundeb yn arwain at Adroddiad Swyddog CAFCASS. Mae swyddogion CAFCASS yn ddeheuig mewn materion plant ac maent yn cynrychioli llygaid a chlustiau’r Barnwr. Maent yn cyfweld yr holl bartïon perthnasol ac yn paratoi adroddiad yn seiliedig ar eu casgliadau fydd fel arfer yn cymryd tri i bedwar mis. Wedi’r adroddiad, mae’r holl bartïon yn mynychu’r Llys i’w ystyried a gweld a ellir dod i gytundeb. Os nad oes cytundeb fe restrir y mater i’w benderfynu gan Farnwr.

Bydd y Barnwr yn edrych ar yr holl ffeithiau perthnasol gan gynnwys dymuniadau a theimladau’r plant.